Ua tapisa solo ma ua salalau i luga o auala o fesoota’iga, le intaneti ma upega tafa’ilagi, le ufitia ai o le to’atele i faanoanoaga ona o le tuumalo o le alii pese ta’uta’ua i le Atu Pasefika ma le lalolagi o George Veikoso poo FIJI e silafia ma iloa ai e le to’atele.
O le aso ananafi i le afiafi na oo mai ai tala, e faamaonia ai le maliu o Fiji.
O lenei tagata pese, o sē ua iloga i lona fatuina ma le tusia o le tele o ana pese i le ituaiga musika poo le genre of music ua ta’ua o le reggae ma le R&B.
E silia ma le 30 tausaga o aumau Fiji i Hawaii, e pei ona amata ta’uta’ua ai ma lauiloa ana taumafaiga i le lalolagi.
O le tausaga 2024 na toe foi ane ai Fiji i lona atunuu o Fiti mo se tasi o ana koneseti tele, ua faaigoaina o le Homecoming i Nadi, ma na molimauina ai le faatumulia o le nofoaga na faatautaia ai lea koneseti, e lē gata na aga’i uma atu tagata poo fans i totonu o Fiti, ae na faapena ona faatumulia ma aga’i ane ai tagatānuu mai isi atunuu na malaga atu i Fiti e molimauina Fiji ma ana pesepesega.
Faamaonia na iai le fuafuaga e faia se isi foi koneseti faapea i le masina o Setema o le tausaga nei.
E to’atele tagata mai itu e fia o le lalolagi na faaalia o latou lagona faanoanoa i luga o upega tafa’ilagi social media e tusa ai ma le tuumalo o Fiji, ae na molimauina foi tagata pepese iloga o le Pasefika na faasoa ma tuu ane a latou tusitusiga ma sa’afi’afiga mo Veikoso.
E leai se tasi na le’i faaalia so latou agaga faafetai ae o se fiafiaga i avanoa na maua ai lo latou fesoota’iga ma talatalanoa ai i itu tau musika, ae o le faafetai tele o le maua o se faasoa mai le alii pese o fautuaga ma fesoasoani e tusa ai ma a latou taumafaiga.
Na tuuina mai foi faamaisega e ala i se pepa o faamatalaga mai le tamaita’i faipule a Amerika Samoa, Congresswoman Aumua Amata.
Na faailoa ai e le tama’ita’i faipule, o Fiji ma ana fātuga e lē na o ni pese faafiafia ae o ni fātuga ma pese sa mafai ona aumai faatasi ai tagata Pasefika ma le lalolagi atoa mai lea tupulaga i lea tupulaga.
O se tasi o fatuga Samoa, na matua’i lauiloa ina ua toe usuina e Fiji o le pese ua faaigoaina o le Sosefina. Ma o loo faalogoina pea le faaaogaina e tagata i le tele o faatasiga.
O le alii o George Fiji Veikoso, na tuumalo o ia i Suva i lona aiga, ma na maliu i le 55 ai o tausaga o lona soifua.
