O le vaiaso atoa lenei ua tuu avanoa ai le faamasinoga o faigāpalota ia i latou ua faasaga iai matāupu e sefulutasi ua faatō’ai i lea faamasinoga e tali ai i tuua’iga ua fesiligia ai agavaa o nisi o sui tauva, faapea ma lu’i ua fesiligia ai ni faai’uga a le Komesina o faigāpalota e faasino lea i le talia ai o le lesitala o nisi o sui faatutū.

O le Aso Faraile na te’a nei na faamuta ai le avanoa e faaulu ai ni lu’i faaletulafono ma faailoa ai e 11 matāupu ua faatō’ai atu.

O le Aso Gafua a sau le aso 28 o Iulai o le vala’auga muamua o ia matāupu ma faatulaga ai e le faamasinoga o faigāpalota aso e tagofia ma su’esu’e ai.

E lima tagi o loo autū i le faalēaogāina o le avea o nisi o sui ua lesitala e avea ma sui faatutū, ae ono tagi o loo lu’i ai faai’uga a le Komesina o faigāpalota.

O ia matāupu o loo faaulu mai e nisi o sui tauva o le itumalo faapalota o Gagaemauga 1, Faleata 3, Faasaleleaga 1, Faleata 2, Faleata 4, Gagaifomauga 3, Vaisigano 2, ma Faleata 2.