E ui ua faamuta le paeaiga 17 a le Palemene ae toe iva masina atoa le lima tausaga o le nofoaiga, peita’i ua talia e le Kapeneta o le malo tausi le fautuaga a le Minisita o loo iai le vaaia o le ofisa o le fono ma le Palemene, ina ia totogi atu ia i latou sa avea ma sui Faipule o le paeaiga 17 penefiti ma faamanuiaga tau totogi o i latou uma e 53 sa avea ma sui Faipule o le paeaiga, e ui e le’i mae’a le lima tausaga.
O le tasi o tulaga sa faamanino e le minisita le afioga Lautimuia Afoa Uelese Vaai e ala i se faai’uga a le Kapeneta a le malo tausi, o le ta’iala faaletulafono mo aiaiga o sui o le malo tausi.
Faaalia e le Minisita ua na o le Fofoga Fetalai e maua le totogi ae toe faafoi le taavale a le malo.
O le Sui Fofoga Fetalai e lē maua se totogi toe faamuta foi lona faaaogāina o le taavale, e faapena foi i le ta’ita’i o le Itu Agai.
O ta’iala ia sa faamanino e le Loia Sili i se talosaga na ave iai e le Palemia ma le Kapeneta o le malo tausi, ma ua faaalia e Lautimuia, o le isi malo tausi i le lumanai o le ta’iala lava lea e tatau ona mulimulita’i iai.
Ua na o le Palemia ma Minisita o le Kapeneta o se malo tausi e agavaa i faamanuiaga o totogi ma taavale mai lava i le taimi e faata’ape ai le Palemene se’ia oo ina mae’a le isi palota tele ma faaulufale le paeaiga fou a le fono aoao faitulafono.
