O se ofisa loia tuma’oti o le a finauina moliaga a leoleo faasaga ia Lise Marie Schmidt, ina ua lē mafai e leoleo ona finauina e mafua i se sootaga vavalalata o leoleo ma nisi o molimau a le itu tagi.

O le Aso Lua o lenei vaiaso na toe valaau ai moliaga o le matāupu lenei tau faamasinoga ma faatulaga ai le aso 3 o Iuni e toe fofogaina ai, ma e tatau ona oo atu i le valaauga lea ua faamautū uma moliaga a leoleo.

O moliaga ia e mafua i le tusi na ave e Lise i le Ao o le Malo, ma le tusi i le Loia Sili a le Malo na faailoa ai ni tuua’iga i ni aafiaga o le tamaitai Palemia i le maliu o le tamaitai polofesa o Dr Caroline Sinavaiana Garbbard.

O lea gaioiga solitulafono o loo molia ai e leoleo le tamaitai tusisolo ma talafatu o Papalii Sia Figiel o loo nofo taofia i le vaaiga a leoleo talu mai le masina o Me o le tausaga ua mavae.

E le’i tuuina atu se tali a Lise i moliaga ae o le tamaitai loia o Tanya Toailoa ua tula’i mo lē ua molia.