E lē o toe mamao ona maua lea o le avanoa o tagatānuu Niu Sila e silasila ma maimoa ai i se ata tifaga.
O se ata na tuufaatasia e manatua ai aafiaga na tula’i mai i le faalavelave mata’utia na tula’i mai i le atunuu i le faaitu e ‘eli ai minerale o le koale poo le coal mine i Pike River.
O se faalavelave na tula’i mai i le aso 29 o Novema o le tausaga e 2010, ma na maliliu ai le to’a 29 o alii na galulue ai, ina ua pā le nofoaga poo se explosion i le Pike River.
E faamauina ai foi le galuega fītā na faatino e ni tamaitai se to’alua, o ni auaiga a nisi o alii na maliliu i lea faalavelave.
O le galuega faatino a ia tamaitai e suafa ia Anna Osborne ma Sonya Rockhouse na o la tutū malosi e finauina lo latou tagi faasaga i le kamupani ona o tulaga pagātia o aiga talu ai le faalavelave ua ma’umau ai soifua o alii e 29.
Ta’ua e le alii faatonu o le tuufaatasiga o le ata tifaga, lona agaga faagaeetia ma lona fiafiaga o le a maua e tagata le avanoa e silamaimoa i le ata, ma iloa vaega uma na feagai ma nei tamaitai aemaise nai aiga i le taimi na alia’e mai ai le matāupu i le tausaga 2010.
Ua faamauina na pu’e lea ata tifaga i Greymouth ma nisi o vaega o Ueligitone.
Ta’ua o le a amata faaalia lea ata i le Sydney Film Festival i le aso 7 o Iuni ona faia lea o se faaaliga tele poo le premiere i Greymouth i le aso 30 o Oketopa.
Māua foi o le a to’atele aiga o ē na maliliu i le Pike River e maimoaina le ata tifaga.
Puna o Faamatalaga: https://www.1news.co.nz/2025/05/28/pike-river-film-premieres-trailer-ahead-of-october-release/
