O le matāupu a Ausetalia ma Isaraelu ua faasolo ina tulimata’ia e le to’atele talu mai le tulaga na iai i le aso ananafi ua faalēaogāina ai e Isaraelu visa o sui o Ausetalia i Palesitina.
O le asō ua faailoa mai e le BBC ua tuua’ia ai e Netanyahu le Palemia o Ausetalia, Anthony Albanese i le faalataina o Isaraelu ma lona tuulafoa’iina o le komiuniti o tagata Isaraelu i Ausetalia.
Fai mai Netanyahu o le a manatua e tagata i le talafaasolopito Albanese i le tulaga o loo iai, o se tagata polokiki e vaivai.
Sa faasā e Ausetalia se sui mai le faigāmalo a Isaraelu mai le ulufale i Ausetalia i le vaiaso nei ae tali ane iai Isaraelu e ala i le faalēaogāina o visa o sui o Ausetalia i le Palestinian Authority.
O le faamatalaga a le minisita o femalagaa’iga a Ausetalia, Tony Burke na faia i le lipoti lea ua ta’ua ai ua afua le ma’ema’eā o Netanyahu ia Ausetalia ina ua folafola e Ausetalia o le a faaopoopo atu ma ia i le fuafuaga a le UK, Farani ma Kanata lea ua fuafua e amana’ia ai se setete o Palesitina.
Puna o Faamatalaga: https://www.bbc.com/news/articles/c5ylkpp77qxo
