E silia ma le 30 sui o le vaega o puipuiga a Niu Sila – le New Zealand Defence Force ua taunuu atu nei i le motu o Ma’uke i le Atu Kuki mo nisi o galuega toe faaleleia o loo fuafua mo lea itu o le motu.
Faamauina i se pepa o faamatalaga ma le vaega o puipuiga – le NZDF, e lē gata ina aga’i atu a latou sui ae o lea na malaga faatasi atu ma nisi o tagata galulue i matātā eseese i galuega tetele – tradespeople mai Ausetalia, Fiti, Tonga, ma Vanuatu.
Ma o se galuega o loo faamauina le faataunuuina i lalo o se polokalame ua faaigoaina o le Exercise Tropic Twilight.
O nei galuega e aofia ai le toe faaleleia o itu ma vaega o loo maua mai ai le eletise e faaaogā ai le malosi’aga o le lā poo le solar farm a le motu o Ma’uke, o galuega mo vai taumafa, o se hall ma le falea’oga a lea motu o le Atu Kuki, Apii Ma’uke.
Faaalia i le pepa o faamatalaga, na molimauina e sui mai Niu Sila le feiloa’i fiafia o a latou sui ma tagatānuu o Ma’uke ma na vaaia le sagisagi atu o tagata e faatali lo latou oo atu.
Faamauina le faatino ai foi e ia tagatānuu o le Pasefika a latou tu ma aga i fanua i le faafeiloa’iga o le aumalaga.
Faamanino e le ta’ita’i o le aumalaga- Troop Commander Lieutenant Jarrod Wilson o le toe faia ai o galuega faaleleia i vaega mo suavai taumafa ma vaega maua le eletise e maua mai le lā- le solar system o le a telē lava lona aogā ma o le a umi foi ona faaaogā e tagatanuu o le motu.
Faaalia e tagatanuu o Ma’uke faapea le pulenuu ia Joanne Rongoape Stephens, o latou lagona faagaeetia ma le faafetai i sui o le NZDF ma inisinia mo lea fesoasoani tele.
Toe faaopoopo foi Stephens i le tāua tele o le lelei o vaega uma e malu ma ola lelei atu ai le suāvai taumafa.
Na faailo foi e sui o le vaega o puipuiga a Niu Sila lo latou fiafia tele i le mafai ona o latou maua lea avanoa e fesoasoani atu ai i o latou uso a tagata i le Pasefika.
Puna o Faamatalaga: https://www.nzdf.mil.nz/media-centre/news/nzdf-throws-weight-into-cook-islands-infrastructure-work/
