Ua lē manuia foi le sa’iliga avanoa a le Manu Samoa i le Ipu o le Lalolagi o le tausaga e 2027 ina ua tutusa i le ta’i 32 ‘ai i le taaloga ma le ‘au a Chile e pei ona sa maimoaina i le taeao o le Aso Sa ananafi i Samoa.
O lea ua toe sauni i le isi taaloga ma le ‘au lava a Chile i le faai’uga o le vaiaso nei e faamautū ai pe maua se avanoa o le tatou ‘aulakapi i le Ipu o le Lalolagi.
E ta le mālōlōga o loo ‘ai silia Chile i le 25 ae valu ‘ai o le Manu Samoa, ma o le ‘afa mulimuli o le taaloga na matuā tinou ai le tatou ‘au i le fia manumālō peita’i e ui ina lē ausia le tulaga na mana’omia ae sa tutusa ‘ai o le taaloga i le faai’uga.
