E le’i atoa se aso talu mai le Aso Lua na logotala ai le atunuu i le faata’ape o le Palemene mo le isi palota tele, ae molimauina i galuega a le ofisa o le komisi o faigāpalota i Mulinuu le lolofi atu o le to’atele e fia fai a latou lesitala i itumalo e palota ai.
O ata pu’e mai le ofisa autū i le po anapo na molimauina ai le galulue pea o le aufaigaluega ae ua pogisa, a o talimau pea le to’atele ma faatalitali le avanoa e oo atu ai e fai a latou lesitala.
O vaaiga masani ia i tausaga ua tuana’i ina ua lalata le palota, ua tumutumu le ofisa autū o faigāpalota i le la’u atu e sui tauva o tagata e lesitala.
Talu ai ia vaaiga ua mavae sa faia ai teuteuga o le tulafono o faigāpalota ma faasā ai ona toe o ni sui faatutū ma ni a latou komiti e la’u atu tagata e lesitala.
O se solitulafono i lalo o le tulafono o faigāpalota lea gaioiga.
O le taimi nei ua alu lava le tagata ia e lesitala.
Ua aiaia faaletulafono le faamalosia ona lesitala ma faamalosia foi ona fai le palota.
A lē usita’ia ia aiaiga ua molia ma faia iai faaasalaga tupe.
O loo i le motu o Savaii nisi o le aufaigaluega a le ofisa o le komisi o faigāpalota mo le faia o lesitala.
