Ua faaamālōlō le ofisa sili sa faauluulu iai galuega o le ofisa o le Fono Faavae o le itumalo palota o Anoamaa 2, e māfua i tuua’iga ua ia tala ma faaaogā le $12,400 tālā o se vaegatupe o le poloketi miliona tālā.

Ua faaalia i le tusi a le ta’ita’ifono o le komiti o le Fono Faavae a lea itumalo sa tuuina atu i le Ofisa Sili o le Matāgaluega o Tinā ma Tama’ita’i, Atina’e o Afio’aga ma Aga Fesoota’i o loo vaaia le poloketi, o le masina o Me o le tausaga nei na molimauina ai lea faaletonu i le faatinoga o tiute o le ofisa sili.

E lua siaki sa talaina e le ofisa sili o le tasi o siaki e $4,200 a o le isi e $8,200.

O lea lava tusi o loo faailoa ai e le ta’ita’ifono le faailoa atu e le faauluuluga o le matāgaluega o tinā ma tama’ita’i i se tusi, le su’esu’eina o le ofisa sili o le ofisa o lea Fono Faavae ma ia faailoa ai o tupe sa ia tala ma faaaogā sa faatau ai fualaau faasāina o le ‘aisa.

Na faasala ai le ofisa sili e lo latou nuu ona o lea gaioiga.

Ua faailoa mai e le Ofisa Sili o le matāgaluega le afioga Loau Donina Va’a, ua tuuina atu le matāupu mo iloiloga faaletulafono ma isi laasaga e talafeagai ai.

O le fonotaga a le Fono Faavae a Anoamaa 2 o le aso 11 o le masina o Iulai na faamuta aloa’ia ai le toe galue o lē sa avea ma ofisa sili o le ofisa o le Fono Faavae.