Ua lipotia mai nei le sasao a’e ai o se mu tele i se tasi o fale ma nofoaga e teu malu ai vaovao poo hay storage i le vaega e ta’ua o le Winslow Westerfield Rd e lata i Ashburton.
O loo faamauina i lipoti i auala o faasalalauga a le leitio faavaomalo a Niu Sila ma le 1News, na lipotia le amata sasao o le afi i lea nofoaga e lata i le tulua o pō ma ao o le Aso Lulu.
Ua ta’ua i lipoti e lua fale na aafia ma e faamaonia mai o le tasi o fale e oo atu i le 8000 fusi o vaovao poo hay bales o loo teu ai ma le isi fale e oo atu i le 6000 fusi vaovao o loo teu ai.
E oo atu i le 40 sui o le vaega a le tineimu na iai i le nofoaga e fesoasoani e tau tineia lenei malaia, ma e 3 ni taavale fuimu na iai o nisi o taavale fuimu na aga’i atu mai nisi o pu mai isi itu o le itumalo ma se taavale tele poo le command unit na fesoasoani, ma le oo atu i le 7 tanevai o lea lava auaunaga na faaaogā e tali atu i le faalavelave.
E oo atu i le 150mita le umi i le 25mita le lautele o le malae ua faaleaga e le mu.
Ma o loo māua e umi lava se taimi e sasao ai lenei afi.
Ae o loo lipotia mai e lē o iai i se tulaga e faapopoleina ai aiga aemaise o maota ma laoa o loo tu lalata ane i le malae o loo aafia i le afi.
Puna o Faamatalaga: https://www.1news.co.nz/2025/05/15/forty-firefighters-battle-blaze-at-ashburton-hay-bale-shed/
https://www.rnz.co.nz/news/national/561034/thousands-of-hay-bales-go-up-in-smoke-in-barn-fire-near-ashburton
