Ua tula’i mo le ulua’i taimi i luma o le Faamasinoga Maualuga le alii o Mikaele Ah Fook, 34 tausaga le matua e tali i moliaga o le fasioti tagata pa’ivalea i poo le manslaughter.
I taualumaga o lenei matāupu, e faapea na tula’i le loia a lē o loo molia, poo le defence lawyer ia Tua Saseve e talosaga, e mafai ai ona tolopo le tuuina atu o se tali a Mikaele e tusa ai ma le moliaga.
Na talia e le faamasino o loo faatautaia lea matāupu ia Justice Mathew Downs le tolopo ai o le tuuina atu o le tali a Mikaele, ma ia poloa’ia ai le alii e toe aga’i atu mo lana matāupu i le 2 vaiaso o i luma.
Ua faamauina ai foi, le toe tolopo ai e le faamasino o le aso e amata ai taualumaga o le matāupu.
Mo le silafia o le matāupu o loo aafia ai Mikaele Ah Fook, i lona faaoolima i se alii e suafa ia Peter Mark Te Kira, 61 tausaga le matua.
Faamauina na maua atu Peter i le faletalipasi i Papatoetoe, i Great South Rd i le aoauli o le Aso Sa, 27 o Aperila, o loo taatia ai, matapogia ma ua lē iloa se mea, e le’i te’i mai foi i luga.
Na maliu Peter i le falema’i i nai aso o i luma i le potu tigāina poo le intensive care unit i le falema’i o Aukilani i le taulaga.
Māua le tuuina mai ai o sā’afi’afiga a le afafine mo si ona tamā ma ia ta’ua ai o si ona tua’ā o se tagata e galuega malosi.
Mai i su’esu’ega a leoleo, e masani lelei Mikaele ma Peter.
Na ulua’i molia le alii o Mikaele i le moliaga o le faaoolima i le Faamasinoga Faaitumalo o Manukau peita’i na toe suia lea moliaga i le fasioti tagata pa’ivalea ina ua maliu Peter ma tuuina atu ai loa lea matāupu i le Faamasinoga Maualuga.
Te Kira and Ah Fook had been known to each other, Detective Senior Sergeant Mike Hayward said last month. O loo tatala nei i tua Mikaele Ah Fook e tālia ai le toe valaauina o lea matāupu i luma o le faamasinoga ma ua poloa’iina e le faamasino le alii ina ua aga’i atu mo lea matāupu i le aso 25 o Iuni.
Puna o Faamatalaga: https://www.newstalkzb.co.nz/news/crime/papatoetoe-bus-stop-death-driver-faces-manslaughter-charge-in-court/
