Ua aumai faalaua’itele e le ofisa o le Komesina o Sulufa’iga se faamanatu tāua a o tapena ai le atunuu i lana faigā filifiliga e ala i le palota, i le tatau lea ona amana’ia le sa’olotoga o tagata Samoa uma e faailoa ma faatino ai o latou tiute o tagatānuu ma aiā tatau i upufai o malo.

I le pepa faalauiloa faalaua’itele ua faailoa ai e lea auaunaga e una’ia pea e le ofisa, tagatānuu ma vaega faaupufai ina ia latou faaaloalogia ma amana’ia le sa’olotoga ma Aiā Tatau a tagata e palota, ma faatino ai a latou lava filifiliga ta’ito’atasi.

O le aiā tatau e ‘auai ai i matāupu faalaua’itele, e aofia ai le aiā tatau e palota ma tauvā i faigāpalota, o le fatu tonu lea o faigāmalo faatemokalasi e atagia ai le finagalo autasi o le to’atele.

E fesoota’i foi ia aiā tatau ma isi foi aiā tatau faavae a tagata, e pei o le aiā tatau e sa’oloto mai ai i faiga faailogatagata; le aiā tatau e tautala sa’oloto ai ma faailoa manatu; le aiā tatau e potopoto faatasi ai; faapea ma le aiā tatau e fealua’i pe malaga sa’oloto ai.

E fesoota’i foi le aiā tatau e tautala sa’oloto ai pe faailoa manatu, ma le iai o se ‘aufaasalalau sa’oloto, tuto’atasi aemaise e faamaoni i le faatinoina o o latou tiute. 

A taufaamata’u ma leai se sa’olotoga o le ‘aufaasalalau, o le a lamatia loa ma vaivai tu ma aga faatemokalasi i faigāmalo a Samoa ma o le a lē atoatoa ai le mata’itūina o faatinoga lelei ma le faamaoni a ona ta’ita’i ma a latou pulega.

O aiā tatau e tautala, faailoa manatu, potopoto faatasi ma fesoota’iga o loo manino i totonu o Tulafono Faavae o Samoa, i lona matāupu e 13(1).

O le Aso Faraile na te’a nei na aumai ai lea faamatalaga faalaua’itele mai le ofisa o le Komesina o Sulufa’iga ma faailoa ai le tapena ai o lana lipoti mo lenei tausaga 2025 e faatatau i le tulaga o aiā tatau a tagata e taula’i i le autū, “Sa’olotoga e faalauiloa ai manatu ma le mauaina o faamatalaga au’ili’ili o faigāpalota”.

Ua valaaulia ai le mamalu o le atunuu, e aofia ai tagata ta’ito’atasi, pisinisi ma faalapotopotoga tuma’oti, ina ia tuuina atu ma faasoa atu finagalo ma manatu e ala i lea su’esu’ega.