Ua sui le faai’uga a le Matāgaluega o Leoleo, Falepuipui ma le Toefuataina o le a lē faasalalauina suafa o avetaavale e le’i totogia sala tupe i solitulafono tau taavaleafi, ae o le a maua le avetaavale o iai sana sala tupe e le’i totogia, i le taimi e mana’omia ai se lipoti a leoleo mo se kilia mai le matāgaluega poo le police clearance report.
Ua faailoa e le matāgaluega e lē maua se lipoti lea pe a lē totogia le sala o loo faamauina e le vaega o taavaleafi.
O le masina nei sa faatulaga e faasalalau ai le lisi o suafa o avetaavale ae ua faia muamua nei se feutaga’iga a le matāgaluega ma nisi o ana paaga e pei o le ofisa o faamasinoga.
O le masina fou o Iuni e pei ona faailoa e le Matāgaluega o Leoleo, Falepuipui ma le Toefuataina o le a amata ai ona lē maua se lipoti o se kilia pe a lē muamua totogi le sala tupe.
O faasalaga ia o loo aiaia i le tulafono o taavaleafi o le tausaga e 2019, lea e tuusa’o lava e leoleo taavaleafi i avetaavale e aunoa ma le tau ave i le faamasinoga, mai soligatulafono e pei o le leai o se laisene avetaavale, o le lē laiseneina o le taavale, avetaavale faatamala, ma le lē faia o le fusipa’u, faapea le solitulafono o le talanoa i le telefoni feavea’i ma ave le taavale.
