O le paeaiga lona 17 a le Palemene ua faamauina nei i talafaasolopito o upufai o le Malo o Samoa, o le paeaiga ua na o le 4 tausaga ma ni vaiaso o le masina o Me e le’i mae’a, e mafua i le pa’ū o le tala o le tupe a le malo e pei ona fautuaina ai e le Palemia le Ao o le Malo e faata’ape loa le Palemene ae toe sauni mo le isi palota tele.
O le paeaiga lona 17 foi ua tolu iai paeaiga faapalemene ua tupu ai le lē talia o le tala o le tupe autū a se faigāmalo.
O le tausaga e 1982 na ulua’i tula’i mai ai lea tulaga i le faigamalo a le Palemia o Tupuola Efi, ma le tausaga e 1985 ia Tesema na pa’ū ai le faigamalo a Tofilau Eti Alesana ina ua teena foi le tala o le tupe.
Mai le 1985 e oo mai i le masina o Me o le tausaga lenei 2025 ua 40 tausaga talu ai, ae faato’ā toe tupu se gaioiga i le Palemene ua fulisia ai sui usufono e teena le faitauga muamua o le tulafono taufaaofi o le faatatauina o tupe.
O le teena foi o le tala o le tupe a le paeaiga lona 17 na tutū faatasi ai faipule e 34 e aofia ai le Itu Agai ma le vaega to’atele o faipule o le Faatuatua i le Atua Samoa ua Tasi.
O le to’asefuluono na lagolagoina e aofia ai le Palemia ma minisita e 14 o le kapeneta ma le sui faipule o Sagaga 2 e lagolagoina le vaega faaupufai e puipuia aiātatau a tagata.
Na faailoa e le ta’ita’i o le Itu Agai i le tauaofiaga a le fono na teena ai le tala o le tupe, o lana matau o le paeaiga sili lenei ona faigatā talu ona avea o ia faipule o le Palemene.
Le susuga Tuilaepa L Sailele Malielegaoi o le ta’ita’i o le vaega faaupufai e puipuia aiātatau a tagata, i se vaega o lana saunoaga i le Palemene e tali fuaitau atu ai i le saunoaga a le Palemia ina ua manumālo le palota o le teena o le tala o le tupe.
