E tolu masina ua tuu atu e le Faamasinoga o Fanua ma Suafa i aiga e 47 o le nuu o Levi Saleimoa e tapena ma solomuli ese ai mai eleele o le nuu o Afega o loo nonofo ma faamautū ai.
O le aiaiga lea na aumai i le faai’uga o le su’esu’ega muamua o le finauga i le va o nisi o matai o aiga o Levi Saleimoa ma Alii ma Faipule o Afega i le tausaga na te’a nei 2024, lea na faatonuina ai e lea faai’uga le fuaina loa o tuaoi o eleele o Afega e tusa ma le faai’uga a le Faamasinoga o Fanua ma Suafa na fofogaina i le masina o Me o le tausaga e 1963.
O lea faai’uga na talosaga nisi o matai o le nuu o Levi sa auai i lea su’esu’ega e toe iloilo pe apili, peita’i sa teena ma lē talia i se i’uga a le faamasinoga o talosaga ia Tesema o le tausaga lava e 1963.
O le toe talosagaina o se isi iloiloga e itu talosaga e tolu e aofia ai le itu a Alii ma Faipule o Levi Saleimoa sa fofogaina i le Aso Lulu ua mavae.
Peita’i ua faaalia i le i’uga a le faamasinoga toe iloilo a le Faamasinoga o Fanua ma Suafa na fofogaina i le Aso Faraile na te’a nei, ua tautuāupega talosaga ona ua mausalī faai’uga a le faamasinoga o su’esu’ega muamua ma le faamasinoga o talosaga apili e faasino lava i le finauga i eleele o loo nofoia e nisi o aiga o Levi.
Ua faailoa i le faai’uga tusitusia a le afioga i le Sui Pelesetene, le afioga Afamasaga Michael Soonalole, e tolu itu na talosaga e aofia ai le itu a Alii ma Faipule o Levi na tuua le potu faamasino e le’i auai i le fofogaina o le talosaga na autū i se faatagaga e toe iloilo ai faai’uga ua mae’a poo le leave to appeal.
Na mafua ona lē auai ia itu ona o le lē talia o le tusi a le itu a Alii ma Faipule o Levi Saleimoa na ave i le Pelesetene sa talosaga ai e tatau ona iai le Pelesetene, Sui Pelesetene ma Pelesetene Lagolago e to’alua i le iloiloina o a latou talosaga.
O le isi mafua’aga sa lē talia e le Sui Pelesetene le finagalo o le tasi o itu talosaga e faasee ese ona o le Sui Pelesetene na faia le faamasinoga na faamautū ai i’uga ua mae’a ma poloa’iina ai loa le fuaina o tuaoi o eleele o Afega.
Peita’i o le finauga lea na faaalia e le Sui Pelesetene e le’i auai o ia i le laulau na su’esu’eina ulua’i talosaga na mafua ai faai’uga ua mae’a ona taoto.
Ua na o le itu tetee e tasi a le itu a Alii ma Faipule o Afega ma le itu talosaga e tasi na auai i le iloiloga lea ua aumai ai le faai’uga ua teena le toe iloiloina o faai’uga ua taoto ma ua mausalī.
O le tolu masina ua tuu atu e tapena ese ai aiga e 47 o Levi Saleimoa na amata faitau mai le aso 16, le Aso Faraile ua mavae na lau ai le faai’uga a le faamasinoga o talosaga toe iloilo.
O le masina o Aokuso e mae’a ai le tolu masina.
