Ua tofia nei le faiaoga taiulu mo le aulakapi liki a le atunuu, le Toa Samoa.
O le susuga ia Benjamin poo Ben Gardiner, lea ua tusilima i ai le komiti faafoe e tauaveina lenei tiute maualuga mo le ‘au a le atunuu.
O le faasilasilaga lea na fofogaina mai e le peresitene o le Lakapi Liki a Samoa, Fiu Ponifasio Vasa i le feiloaiga ma tusitala i le aso ananafi.
O Ben Gardiner o se alii Niu Sila ma e tofia nei mo le faiaoga taiulu a le Toa Samoa, o lea sa galue o se faiaoga lagolago mo le aulakapi liki a le Penrith Panthers, sa galulue faatasi ai o ni faiaoga lagolago mo le ‘au ma le susuga Peter Wallace e lagolago atu i le faiaoga taiulu a le Penrith Panthers o Ivan Cleary mo le 2023 NRL season.
O Gardiner e telē lona potomasani i le tomai tau faiaogaina o aulakapi, ma sa galue foi o se faiaoga lagolago mo le ‘au a le New Zealand Kiwis.
O nisi ‘au sa galue ai foi Gardiner o se faiaoga lagolago, e pei ona sa galue ai mo taamilosaga e lua i le ‘au a le West Tigers i le 2022, ae na avea ma faiaoga taiulu mo le NSW Cup side Western Suburbs i le 2021.
Sa tofia foi Gardiner i taimi ua mavae i tofiga faiaoga i aulakapi i lalo o le 20 tausaga mo le South Sydney, Cronulla, North Sydney, City Origin ma le NSW.
