A o tālia ai nei le faitauga aloa’ia o le taunuuga o le faigāpalota tele a le atunuu sa faagasolo i le faai’uga o le vaiaso ua mavae, o le faitauga muamua e le’i aloa’ia ua manumālō ai le vaega faaupufai o le Faatuatua i le Atua Samoa ua Tasi i le aofa’iga e 33 nofoa.
O lona uiga ua maua e le faatuatua i le Atua Samoa ua Tasi le numela fulisia o nofoa e 51 o le Palemene e fausia ai le faigāmalo fou mo le isi lima tausaga.
O le mae’a o le faigāpalota na saunoa ai le ta’ita’i o le vaega faaupufai le susuga Laaulialemalietoa Leuatea Polataivao Fosi Schmidt i auala o fesoota’iga a lana vaega faaupufai ma ia faafetai i le atunuu ae sa ia ave ai foi le tuualalo i ta’ita’i o patī faaupufai sa tauva o se taimi tāua lenei i le galulue faatasi.
Na toe lagona lea tuualalo ma le tatalo a le Laaulialemalietoa i le susuga Tuilaepa ma le afioga i le Sa’ofaapito i lana saunoaga i le sauniga faafetai a lana patī faaupufai.
Le ta’ita’i o le vaega faaupufai o le Faatuatua i le Atua Samoa ua Tasi, susuga Laaulialemalietoa Leuatea Polataivao Fosi Schmidt.
O le hall tele o le faalapotopotoga o le taaloga soka a Samoa i le malae taalo o le Apia Park na faatumulia i le to’atele o sui lagolago ma le atunuu sa aua’i i le sauniga faafetai a le patī faaupufai.
O le ta’ita’ifono aoao o le Ekalesia Faapotopotoga Kerisiano Samoa susuga i le toeaina Enefatu Lesa sa ta’ita’i i le sauniga.
Le susuga i le faifeau toeaina o le ta’ita’ifono aoao o le Ekalesia Faapotopotoga Kerisiano Samoa susuga Enefatu Lesā, i le sauniga lotu faafetai a le vaega faaupufai o le Faatuatua i le Atua Samoa ua Tasi.
