O le taeao analeila faato’ā tatala ai le itu i Sasa’e o Bay of Plenty talu mai aafiaga o lōlōga tetele na aafia ai ia faaitu o Niu Sila, ma lē mafai ai ona sao le feoa’iga o taavale ma tagata.
Ta’ua i lipoti mai le NZ Herald, o auala e ui atu i Whakatāne ma Opotiki i Wainui Rd ma le State Highway 2 i Waimana Gorge na tapunia i le Aso Lulu, ma le faamoemoe e toe tatala i le taeao analeila, e pei ona faamanino mai e le Pulega o Femalagaa’iga le NZ Transport Agency.
Faaalia e le puleganuu a le itumalo o Opotiki le faatautaia ai o siaki ma faia iloiloga i tulaga ua iai o latou auala.
Ua amata faatino nei foi galuega faamamā a le to’atele o le ‘augalulue o le pulega i le tau aveesea ai o otaota.
Ua fautuaina le mamalu o le ‘aufemalagaa’i ina ia faaeteete pe a aga’i atu taavale i ia itu.
Ia alualu lemū taavale, ina tuumāmāina ai aafiaga e tula’i mai.
I lipoti, na iai nisi o taavale na aafia i le taimi na tula’i mai ai lōlōga.
E to’atasi le tagata na lavea’i mai ona ua lē mafai ona alu ese, sa lavea’i mai o ia a o iai i le taualuga o le taavale.
Faafetaia e leoleo e le’i oo i se tulaga pagātia lea tagata, ae o le faamanatu i tagata lautele ina ia faaeteete i taimi o le faalavelave faapenei.
Puna o Faamatalaga: https://www.nzherald.co.nz/nz/floods-hit-eastern-bay-of-plenty-roads-reopening-after-heavy-rain/IQ2UJGTWVBC7HPELVEPOPUTLXM/
