O le tama’ita’i o Melina Salale o le ‘au a tama’ita’i Samoa, le Manu Sina, sa faasala e faamālōlō e lē toe taalo mo ni taaloga se tolu a le ‘au i le taamilosaga o le Ipu a le Lalolagi o le Lakapi Iuni o loo faagasolo nei i Egelani, ae o lea ua maua se lipoti lata mai, ua toe faaitiitia ifo i le na o le lua taaloga o le a lē taalo ai Salale, ina ua mae’a se isi iloiloga a le komiti o faasalaga na faia i le aso 25 o Aokuso.
Na red card Salale ina ua faasala i le pu’e mata’utia i le taaloga a Samoa ma Ausetalia sa faia lea taaloga i le Salford Community Stadium i le aso 23 o Aokuso 2025.
Na faia le faai’uga a le Foul Play Review Committee i le aso 24 Aokuso ma aumai ai le ulua’i faai’uga lea e tolu taaloga o le a lē mafai ona taalo ai Salale, ae ina ua toe fono le komiti ma faaaofia ai se manatu o le vasega o faia’oga, o lea na toe faia ai le suiga ua na o le lua taaloga o le a lē taalo ai.
O lea faai’uga o loo tumau ai pea ona ioeina le talafeagai o le red card mo Salalei, ae o suiga i le umi o le faasalaga lea ua toe suia, ma e lē o iai foi se avanoa e toe apili ai le faai’uga ua faia nei.
