Ua maua i sa’iliga a leoleo alii pagota e to’alua o Lauititi Tualima ma Aniseko Vaelei lea na sosola i tua ma le falepuipui i Tanumalala i le po o le Aso Tofi na te’a nei.

O le afiafi o le Aso Gafua ananafi i Samoa, na maua ai ia pagota e pei ona faailoa ai i se lipoti a le vaega faasalalau o le Samoa Global o Lauititi na maua i se vaega o Ululoloa, ae o Aniseko na maua i Vaiusu.

O le pagota o Lauititi ua sola soo, ae o lana sola’aga mai le falepuipui i le tau amataga o le tausaga nei, e lua masina o faia sa’iliga ma toe maua ai e leoleo i le masina o Mati ma faafoi atu e tuli lona faasalaga.

O lea sola’aga a Lauititi na faamālōlō lē tumau ai ni leoleo o le falepuipui i le mae’a o se su’esu’ega.

O loo faia ai foi se isi su’esu’ega pe na faapefea ona saofia le sola’aga a Lauititi ma Aniseko mai le falepuipui ua siomia e se pa simā maualuga ua iai ma le uaea ma’ai i le pito i luga o le pa.

O solitulafono o le gaoi ma le talepefale o loo tuli ai faasalaga o ia pagota, ae o Lauititi o se tasi o solitulafono ogaoga o loo nofosala ai o le faiaiga faamalosi poo le toso teine.