E 34 tausaga le matua o se alii pagota o Va’ai Panapa mai nuu o Vailele ma Vaitele tai sa tau sa’ili e leoleo, ona sa sola ese ma le falepuipui i Tanumalala i le Aso Sa na te’a nei.
Ua faailoa e le matagaluega o leoleo, falepuipui ma le toe fuata’ina o se taimi o le taeao o le Aso Sa na sola ese ai lea alii pagota, peitai sa le’i faailoaina i le faasalalauga sa faalauiloa ai le ata o le Va’ai Panapa pe na faapefea ona sola ese ma le falepuipui, auā ua siomia le nofoaga fou o le toese i se pasimā maualuga ua toe alu ai ma le uaea e ma’ai ona tala.
O loo tuli le faasalaga o lea alii pagota i solitulafono o le talepe fale ma le tagovale, ma sa sola muamua foi ma molia ai.
O le fautuaga a leoleo i le atunuu o se solitulafono le faalafi o se pagota sola.
Sa fautuaina foi le atunuu e logo soo se ofisa o leoleo o latalata ane, pe a vaaia lea tagata nofosala i soo se nofoaga o le atunuu, ae o se tala lata mai la lea ua sau mai le matagaluega o leoleo, o lea ua toe maua nei lea alii pagota.
Ua faafetaia ai e le matagaluega a leoleo le mamalu o le atunuu i lo latou lagolagosua i le sa’ilia o lenei alii pagota.
