O le a toe foi le alii iloga i le lakapi liki, Roger Tuivasa Sheck i le kalapu lakapi o le Warriors mo le isi tolu tausaga. I lipoti mai le leitio a Niu Sila (Radio New Zealand) na talosagaina e le alii lakapi le kalapu a le Warriors mo se suiga mo ia i le lakapi iuni i le 2021 ae sa tatala ai pea le avanoa e le Pule Sili o le kalapu Cameron George e toe foi mai ai e taalo.
Na ta’ua e George ina ua taalo Sheck i le lakapi iuni na iai lava lona lagona o loo tatala pea le avanoa mo ia e toe taalo ai i le ‘au pe a toe foi mai i le lakapi liki ma o le fiafiaga foi mo le kalapu o lea ua taunuu lenei fuafuaga.
Na auai lenei alii taalo i le lakapi iuni ua selau sefulutasi avanoa na taalo ai mo le ‘au a le Warriors i le tausaga 2016-2021 mai le faatulagaina o taaloga e selau ivasefulu ma le lima. I le tausaga ua mavae na avea ai o ia o se alii taalo lauiloa faavaomalo ina ua taalo mo le ‘au tele a Niu Sila le All Blacks.
Na ia ta’ua o se tulaga faigata pe a tuua ai o le mafutaga ma le kalapu lakapi a le Blues lea sa amata mai ai i le tausaga ua mavae ma o lona agaga faafetai foi i lenei kalapu ona o le avanoa na tuuina mo ia. Na faaalia foi e le faiaoga a le Blues, Leon MacDonald e telē se sao o lenei alii i le kalapu i le taamilosaga o lenei tausaga a o lei manua i lona aao ma o lona faamaoni ma lona sao tāua i totonu o le ‘au a le Blues o se vaega pito sili lea ona faagaeetia ai o ia.
O loo iai foi le fuafuaga a le alii taalo ina ia toe tulaga manuia le manua o lona aao e faaauauina ai lona sao mo le Blues i taaloga o totoe o lenei tausaga. O se fiafiaga foi lea i le faiaoga a le Warriors, Andrew Webster o le a toe faatasi ai ma le alii o Sheck talu ona auai i le kalapu i le 2016.
