O le afioga Faaulusau Rosa Duffy Stowers o le ulua’i faipule lea na filifilia i le aiaiga o le 10 pasene o nofoa o tamaitai i le paea’iga 16 a le Palemene mai le tausaga e 2016 i le 2021.
Sa tauva o ia i le nofoa o Gagaifomauga 3 ae sa lē manuia i le faigāpalota o le 2016 ae ina ua mana’omia le faamalieina o aiaiga o le 10 pasene o nofoa o tamaitai i le Palemene, o Faaulusau na ausia pasene o palota sa ia maua mai tamaitai uma sa tauva i lea faigāpalota ma atoa ai ia te ia le to’alima o faipule tamaitai i le paea’iga 16 a le fono aoao faitulafono.
O le paea’iga na sosoo ai na faia ai finauga i le faamasinoga pe lima pe ono nofoa o tamaitai, ae na oo i le to’afitu.
Na toe apili le faai’uga a le Faamasinoga Maualuga e le vaega faaupufai o le HRPP ma aumai ai le ta’otoga ua iai nei e tatau ona ono nofoa o tamaitai i le Palemene e faamalieina ai le 10 pasene ae lē to’alima pe to’afitu.
O lea ua toe faailoa le tauva o le afioga Faaulusau Rosa Lavea i le palota tele ia Aokuso, o le a tauva foi i le nofoa o Gagaifomauga 3 lea sa tula’i mai ai le susuga Laauli Leuatea Polataivao Fosi Schmidt o le ta’ita’i o le vaega faaupufai o le Faatuatua i le Atua Samoa ua Tasi.
O loo tauva le afioga Faaulusau i le fu’a a le vaega faaupufai e puipuia aiā tatau a tagata lea sa ia lagolagoina a o avea ai ma faipule na faaatoa ai nofoa e 5 o sui faipule tamaitai i le paea’iga 16 a le Palemene.
O le faigā filifiliga lava o loma nei a le atunuu o lea ua toe molimauina o le a toe tauva sui tamaitai e to’alua sa filifilia i tofi o le Palemene i aiaiga o le 10 pasene i le paea’iga 17 ua faata’ape ae valaau le palota tele ia Aokuso.
O le afioga Aliimalemanu Alofa Tuuau mo le tofi faaolioli o Alataua i Sisifo ma le afioga Faagasealii Sapoa Feagia’i mo le tofi faaolioli o Aleipata Itupa i Lalo.
O itumalo faapalota foi ia sa tauva ai i la’ua i le palota tele o le 2021 i le fu’a a le vaega faaupufai e puipuia aiā tatau a tagata.
O Teuteuga o le tulafono o faigāpalota sa naunau ai le Malo e suia le aiaiga o le 10 pasene o nofoa o tamaitai o loo taoto i le Palemene le faitauga faalua ma felafolafoa’iga o ia teuteuga e le’i mae’a.
O le a faato’ā iloa le lumana’i o ia teuteuga pe faaauau pe faasolomuli, i le finagalo o le atunuu i lana faigāpalota o loma nei i se faigāmalo fou e tula’i mai.
