Ua toe tusi aao le Malo e ala i se finagalo o le Kapeneta e faaauau pea ona avea ma faauluuluga i le tulaga Ofisa Sili o le Matāgaluega o Tupe a le Malo le faletua le afioga Saoleititi Maeva Betham-Vaai, mo le isi 3 tausaga o lana konekarate.
O Mati o le tausaga e 2022 na ulua’i filifilia ai lea tamaitai o le atunuu e avea ma Ofisa Sili o lea matāgaluega a le Malo i le tuana’i o ni tausaga sa galue ai i le Ofisa o le faletupe o le lalolagi i lo tatou atunuu.
Ua faailoa e le Civil Society Support Programme i lana fesoota’iga i upega tafa’ilagi lo latou agaga fiafia ma le faagaeetia ina ua toe filifilia Saoleititi e tauave lea tofiga ona o lona tulaga o le ta’ita’ifono o le Komiti Faafoe o lea auaunaga tuma’oti.
Faaalia e le Civil Society Support Programme o le toe filifilia e le malo o lea Ofisa Sili o se ata manino o lona tula’i e lagolago polokalame ma taumafaiga uma mo le manuia o auaunaga tuma’oti i le atunuu.
