Ua faamaonia mai nei i lipoti a le RNZ le toe maua ai o le avanoa o le tama’ita’i iloga o le taaloga lakapi o Ruby Tui, e taalo ai mo le ‘aulakapi a tamaita’i i Niu Sila, le Black Ferns.
Ua ta’ua i le faalauiloa mai ai o sui o le a fai ma ‘avefu’a o le Black Ferns mo le taaloga ma le ‘au malosi a Ausetalia i le Aso Toonai nei.
I lipoti e faapea e le’i maua le avanoa o Ruby e taalo ai mo le ‘au a le atunuu i le taamilosaga a le Pasefika, i le masina o Me o le tausaga nei.
Ae na molimauina le taalo ai o lea tama’ita’i mo le ‘au faapea le ‘au tele ta’ito’a sefululima i le faai’uga o le la vaiaso, na māua ai loa le valaauina o Ruby e taalo i lenei vaiaso.
Ua ta’ua o le filifilia ai foi o Ruby na faia e na te suitulaga ai mo se tasi o tama’ita’i ua faamanu’alia i taaloga.
Ma i le filifilia ai o le tama’ita’i o Ruby Tui mo le ‘au a le Black Ferns, o le a atoa ai i le 20 o taaloga faitaulia poo tests a le tama’ita’i mo Niu Sila.
Ua faamauina o le taaloga mulimuli lenei a le ‘au a le atunuu le Black Ferns o le a faia i laufanua o Niu Sila a o le’i faimalaga atu mo le Taamilosaga o le Ipu o le Lalolagi i Egelani.
Mo le silafia o le tama’ita’i o Ruby Tui o se alo o Samoa ua iloga ana taumafaiga i lea faagatama, ma lana tautua mo Niu Sila e ala i lea taaloga o le lakapi.
O ia foi o se tasi o sui o le ‘au a le Black Ferns na taalo i le Ipu o le Lalolagi i le tausaga 2022, e pei ona sola mai ai le ‘au ma le siamupani.
Puna o Faamatalaga: https://www.rnz.co.nz/news/sport/566526/ruby-tui-back-in-black-ferns-squad
