Ua faailoa e le ofisa sooupu o le Malo se faai’uga a le Kapeneta ua toe filifilia ai i tofiga Ofisa Sili o le pulega o le matāgaluega o le va i fafo ma fefaatauaiga ma le ofisa o numela faamaumauina ni tamalii o nisi o le aufaigaluega sinia a le malo e tauaveina ia tofiga mo le isi 3 tausaga.
O le afioga Peseta Noumea Simi o se tasi o tinā o le atunuu ua leva tausaga ua 40 ma ona tupu o tautua i le Malo ae o le tausaga e 2015 na ulua’i filifilia ai e avea ma Ofisa Sili o le Matāgaluega o le Va i Fafo ma Fefaataua’iga, ma ua faatolu ai nei ona tusi aao iai le malo na te tauave le vaaia o lea matāgaluega tāua a le malo.
O le afioga Leota Aliielua Salani ua silia i le 30 tausaga o lana tautua i le ofisa o numela faamaumauina a le malo, ma ua toe filifilia e avea ma faauluuluga o lea auaunaga tāua mo le isi 3 tausaga o lana konekarate.
