O le 53 o nofoa o le paea’iga lona 17 a le Palemene ua faata’ape ma toe faia ai le palota tele ua mae’a nei, o le 22 o faipule o lea paeaiga ua toe filifilia mai e o latou itumalo, ae 31 ua lē toe filifilia.
O le vaega faaupufai o le Faatuatua i le Atua Samoa ua Tasi e to’a sefululua ua toe filifilia e aofia ai le ta’ita’i o lea pati susuga Laaulialemalietoa Leuatea Polataivao Fosi Schmidt, o le faipule tama’ita’i le afioga Mulipola Anarosa Ale Molioo, o le tofa Ale Vena Ale, o le tofa Fesola’i Apulu Tusiupu Tuigamala, o le afioga Agaseata Tanuvasa Valelio Tanuvasa Peto, o le tofa Auapaau Mulipola Aloitafua Mulipola, o le tofa Masinalupe Leatuavao Makesi Pisi, o le afioga Toelupe Poumulinuku Onesemo, o le afioga Fuimaono Maiava Asafo Tito, o le afioga Tea Peato, o le tofa Seuamuli Fasi Toma, ma le tofa Foisala Lilo Tuu Ioane.
– Lefaga ma Faleaseela
– Gagaifomauga 2
– Gaga’emauga 2
– Aana Alofi 1
O le vaega faaupufai e puipuia aiā tatau a tagata e to’aono ua toe filifilia mai e aofia ai le ta’ita’i o lea pati, le susuga Tuilaepa Lupesoliai Sailele Malielegaoi, o le tofa Lenata’i Victor Tamapua, o le tofa Lealailepule Rimoni Aiafi, o le afioga Lupematasila Lavea Galumalemana Tologatā Tile, o le tofa Lauofo Fonotoe Nuafesili Pierre Meredith, ma le afioga Loau Solamalemalo Keneti Sio.
– Sagaga 1
– Vaimauga 2
O le vaega faaupufai o le Samoa ua Potopoto na faato’ā faavae ae ua lalata i le palota tele, o sui ua toe tusi aao iai o latou itumalo i le mae’a o le faigāpalota o le ta’ita’i le afioga Fiame Naomi Mataafa, o le tofa Leatinuu Wayne Sooialo, ma le afioga Faleomavaega Titimaea Tafua.
– Aleipata Itupa i Lalo
O le sui sa tauva tuto’atasi ua manumālō mai, le tofa Mau’u Siaosi Pu’epu’emai e pei ona silafia sa avea ma se tasi o minisita o le malo tausi ma sa i totonu o le pati faaupufai o le Samoa ua Potopoto a o le’i faasee tuāgalu ma tauva faatuto’atasi ona o le finagalo o lona itumalo.
– Vaa o Fonoti
O le Faatuatua i le Atua Samoa ua Tasi e 19 ona sui fou na filifilia i le palota tele ma le vaega e puipuia aiā tatau a tagata e to’avalu.
O isi pati faaupufai sa tauva e pei o le Samoa Labour Party, Tumua ma Pule ma le Constitutional Democratic Republic e leai ni sui tauva na manuia.
