Ua mae’a ona fausia le tulaga ma toe faatū ai ma le laupapa faalauiloa poo le billboard a le sui tauva o le itumalo palota o Faleata 2 le tofa Leatinuu Wayne Sooialo, lea na faaleaga e se tagata poo ni tagata foi i le faai’uga o le vaiaso na te’a nei.
E lē gata ina faatama’ia lea meatotino a le sui tauva ae na ave faagaoi ai ma le mōlī e ola i le malosi o le la sa ola e iloa ai le laupapa faailoilo i le po.
O le mōlī ua faailoa e le sui tauva na faameaalofa ane e se aiga agalelei o le pitonuu o Falelauniu lea o loo tū ai ma le laupapa faailoilo.
O le palota tele o le 2021 na aliali mai ai foi ia gaioiga solitulafono a o tauva Leatinuu i le nofoa o Faleata 2 i le fu’a a le Faatuatua i le Atua Samoa ua Tasi, ma sa aliali mai foi a o tauva i le nofoa o le itumalo tu taulaga o Faleata i le palota tele o le tausaga e 2016.
E lē o iloa pe tuuina atu le gaioiga na tula’i mai i le faai’uga o le vaiaso ua mavae i aao o leoleo mo se su’esu’ega.
