O le tausaga e 2022 na ulua’i tofia ai le afioga Fui Tupa’i Mau Simanu e avea ma faauluuluga poo le Ofisa Sili o le pulega o le Matāgaluega o Galuega Tetele ma Fela’ua’iga, ma o lea ua toe tusi aao le malo i lea tamalii e toe faaauau lona tofiga mo le isi 3 tausaga.
Ua faailoa e le ofisa sooupu a le malo lea filifiliga ina ua faamaonia ai e le kapeneta le toe tofia o Fui e avea ma faauluuluga o lea matāgaluega a le malo.
O se tamalii ua silia nei i le 30 tausaga o lana tautua i le Malo e pei ona sa galue i nisi o matāgaluega e aofia ai ma le faalapotopotoga o le malosi faaeletise.
