O lea ua sau i tua le faasilasilaga mai le NZ Post, ua toe tatala nei le latou auaunaga e lafo atu ai afifi mai Niu Sila i le Iunaite Setete o Amerika.
O le masina o Aokuso na taofia ai lea auaunaga mo le USA ina ua faasilasila mai le siitia o le tau e totogi o lafoga mo oloa e aveina atu mai Niu Sila i Amerika poo tariffs.
Sa faailoa lava i lena taimi e le NZ Post o le a na o se taimi puupuu e taofia ai lea auaunaga, peitai e le’i patino mai se aso na latou faailoa e toe amata ai.
E 15 pasene le lafoga totogi o oloa na taia ai Niu Sila i le amataga o lena masina, ua sili atu ai nai lo le 10 pasene sa faasilasila muamua mai.
Ae o le asō lea ua toe faasilasila mai e le NZ Post, ua toe tatala ai lea auaunaga mo le lafoina atu o afifi a tagata i Amerika.
Saunoa le pule sili o le vaega e vaaia oloa e auina atu i isi atunuu, Jared Handcock, e latou te iloa le tāua o fesoota’iga a tagata o loo faaaogāina a latou auaunaga ma nai o latou uo ma aiga i Amerika.
O lea ua latou gaioi vave ai e fetuuna’i nisi auala ina ia faamalieina ai pea tagata faatau ma faaauau ai foi ona faagasolo le latou auaunaga.
O nisi o suiga ua mafai ai ona ‘alofia le totogia o nei lafoga ma tiute, ae lelei lava le faafesootai o le NZ Post mo le faamaninoga atili o nei suiga mo le lafoina o faamomoli poo afifi i le Iunaite Setete.
Puna o Faamatalaga: https://www.rnz.co.nz/news/national/572862/nz-post-resumes-parcel-deliveries-to-us
