Ua lipotia ma faamaonia mai nei le maliliu ai o ni tagata se to’atolu i totonu o Aotearoa nei i le faama’i ua ta’ua o le meningitis i totonu o le 5 vaiaso.
Ma ua valaau ai nei e le to’atele le moomia ai ona amata faatulaga ma faatino tuipuipui mai nei faama’i.
I ripoti mai le New Zealand Herald, na faamauina ai e to’alima ma’i ua faamaonia le aafia i le meningitis.
O le to’alua ua maliliu e ta’ua na maliliu mai le faama’i o le meningococcal meningitis a o le tasi na maliu mai le pneumococcal meningitis, e pei ona faamauina o se tasi o i latou nei o se talavou i Waikato, na maua i le faama’i i le mae’a ai ona aafia i le faama’i pepesi o le flu.
Lipotia, o le isi o loo aofia i ē ua mama’i o se tamaitiiti a’oga i Kalaiesitete, ma o loo taofia pea ma togafitiga i le maota gasegase; ina ua amata ona vaaia āuga o le meningococcal i le uma ai o se tasi o taamilosaga lakapi.
Ua lapata’ia ai nei e le faalapotopotoga o le Meningitis Foundation Aotearoa NZ le lautele, e matua’i aafia lava nai fanauiti, o tagata Māori ma tagatānuu Pasefika, faapea nai tuaa sinasina poo tagata matutua, mai i lenei faama’i; ma o le a maualuga ai foi le numera e ono fano o latou soifua ma aafiaga tumau e aafia ai i latou, e pei o le aafia ai o le fai’ai se’i tulou.
Faamatala e le ta’ita’ifono o le faalapotopotoga ia Gerard Rushton lona faanoanoa tele i le maua ai o tagata ma isi ua maliliu i le faama’i ma ia ta’ua sa tatau lava ona faasolo tuipuipui o le meningitis semanū e lavea’iina mai ola o nai tagata ua maliliu.
I le taimi nei, e lē o mafai e le auaunaga e nafa ma le fetuuna’ia o vailaau ma tuipuipui – le Pharmac NZ ona aumai ni vailaau mo le meningococcal talu ai e lē tele se tupe na faamatuu ese mo lea ituaiga gasegase ma ua lē mafai ai e le to’atele o aiga ona maua se faamāmā avega i puipuiga mai i lea faama’i.
Ua faamaonia mai i ripoti le talosagaina ai e le faalapotopotoga le tatau ai ona faatupe ma iai le fesoasoani i tuipuipui mo tupulaga talavou mai le 13 i le 25 tausaga le matutua.
Ma ua latou tatalo ai i le malo ina ia tatau ona o latou savalia ia fuafuaga, auā a leai, o le a vaaia le to’atele o tagata o le a fano soifua.
Ua faamauina foi le tuu atu ai o fautuaga mo aiga, o a’oga ma le lautele ina ia mataala ma afai ae alia’e ni āuga o le faama’i e pei o le tigā tele o le ulu, pata o le tino, e lē mafai ona minoi le ua poo le stiff neck, ma le segaia o mata i mōlī, light sensitivity, ona vave ave lea e fai togafitiga.
