Ua faatali nei i se faasalaga a le faamasinoga tagata e to’atolu o se aiga i Faleula ina ua faamaonia moliaga o le faaoolima, faia o se faaoogalima, ma le faia o se gaioiga solitulafono ma le faamoemoe e faaleaga ai ni meatotino.

E to’afā i latou sa molia ae to’atasi ua lē faamaonia ona moliaga, ae mo Seugamalo Ake Uele, Justina Muaina Seugamalo Uele Hurrell, ma Tikeau Uele Hurrell ua faamaonia o latou moliaga e mafua mai i se vevesi na tupu ia Iuni o le tausaga ua mavae, ma aafia ai i le faaoogalima le Faipule o Sagaga 1, le afioga Loau Keneti Sio ma lona faletua.

O loo iai foi se tagi a lea aiga faasaga i le Faipule ma lona faletua ma o loo tālia ona taualumaga i le Faamasinoga Faaitumalo.

O le vevesi na tula’i mai sa mafua i ni matāupu tau fanua i le lotoifale o le aiga o le Faipule, o ia foi o le Sa’o o le aiga.