O le vaiaso na se’i mavae atu na tuuina atu ai a tatou talafou, e tusa ai ma se matāupu na lipotia mai, i le maliu ai o se pepe e lua masina le matua talu ai se faaletonu i le fua faatatau o le vailaau ae o se fuālaau na ave mo lea pepe.
Ma o lea ua mafai ona maua faamatalaga mai le leitio faavaomalo a Niu Sila, ua faailoa ai e to’atolu o ni aufaigaluega o le faletalavai i Manawatū, o loo aafia i lenei matāupu.
E ta’ua i faamatālaga o i latou e aofia ai sē o loo galue o se tagata e faata’ita’i i le galuega poo se intern pharmacist, o se tagata faato’ā tuu iai le matāfaioi, poo le faato’ā a’oa’oina i le tomai o le fuaina o le malosi o fuālaau ma vailaau o le phosphate mo le ulua’i taimi (trainee techician), ma se tagata faauuina i lea matātā ma ua resitala aloa’ia e faatautaia lea galuega (registered pharmacist).
E tusa ai ma le faamaninoina o le sasi, e faapea, e sesē le vaai a le intern poo lē o loo galue faata’ita’i i le faletalavai, i rgvfua faatatau o le malosi e tatau ona faatino, ma lona lē iloa o le pepe e ana le fuālaau.
Sau i le tagata faato’ā a’oa’oina mo le uluai taimi i le fuaina le fuaalau o le phosphare mo le uluai taimi, na misi foi ia te ia lea sasi, ma faaauau ai pea ona fua iai le fua 500 milikalama e pei ta’ua o lea malosi e ave i le tagata matua.
O le manatu ‘ai a maua e lē ua fai sina umi i le galuega ma ua resitala aloa’ia i le matātā peita’i, e le’i iloa e ia le sesē o iai fuālaau.
I le alia’e mai ai o lea faalavelave, ua lipotia mai le faamalōlō lē tumau ai o le intern, ae o le tagata faauuina i le matātā poo le registered pharmacist ua faapea ona faamave mai le galuega.
E ui i le matuitui o aafiaga ua feagai ma le ulugalii e ona le tamaitiiti, ae ua la lē tuua’ia le intern i le sasi na tula’i mai.
Faaalia o la manatu sa tatau lava ona iai se tagata e mata’itūina le galuega a lea tagata e fai, ina ia mautinoa le sa’o ma le lelei atoatoa tulaga uma o malosi o fuālaau o loo tuuina i lalo mo ma’i e aga’i atu.
O lenei matāupu na alia’e mai ina ua maliu le ‘alu’alutoto e 2 masina le matua ae igoa ia Bellamere Arwyn Duncan i le falema’i le Starship Hospital i le aso 19 o Iulai, ina ua avatu faatopetope le tamaitiiti mo togafitiga ina ua oo i se tulaga faaletonu Bellamere i le uma ai ona faainu o le fuālaau o le phosphate.
Ina ua tula’i lea matāupu, o lea na faama’ite ai loa su’esu’ega i tulaga o le mata’itūina o vaega i le fuaina o malosi o fuālaau ma vailaau a tagata mama’i, ma le finauina e mātua o Bellamere o le fai o se tulafono e saga faamalosia le tatau ai ona siaki e tagata faigaluega o fale alavai pe to’alua pe to’atolu foi ina ia mautinoa le sa’o o malosi o fuālaau e tuuina atu i tagata lautele o loo autovaa atu e fai a latou talavai.
E pei ona galulue ai le Matāgaluega o le Soifua Mālōlōina, ma le Auaunaga o le Soifua Mālōlōina, le Medsafe ma le laulauafono o i latou e iai tomai i fuālaau ma vailaau o le soifua mālōlōina, poo le Pharmacy Council, ia vave ona maua se tali i tulaga o su’esu’ega faapea le fetuuna’iga i vaega e tatau ona faatino mo le saogalemu o tagata.
