Ua toe taliu mai i Samoa ni fanauiti se to’atolu sa faia o latou ta’otoga o le fatu i le falema’i o tamaiti i le atunuu o Fiti i se fesoassoani sa faia fua ai o latou ta’otoga e foma’i o le polokalame ua faaigoaina o le Gift of Life heart surgeries.
O foma’i faapitoa mo togafitiga o le fatu mai Niu Sila ma Ausetalia sa feagai ma le faia o ta’otoga o ia fanauiti o le atunuu.
I se faasalalauga faalauiloa mai le ofisa o le Komesina Maualuga o Samoa i Fiti o loo faailoa ai o fanau mai Samoa ma isi atunuu o Tuvalu, Tonga, Vanuatu ma Kilipati sa aofia i ta’otoga o le fatu sa faia mai le aso 19 i le aso 30 o le masina na te’a nei o Iulai.
O le Aso Tofi na te’a nei na toe taliu mai ai i Samoa fanauiti e to’atolu ma nisi o o latou aiga sa malaga mo o latou togafitiga.
O le Komesina Maualuga o le tatou malo i lea atunuu le afioga Aliioaiga Feturi Elisaia sa valaaulia e saunoa i le sauniga na sami ai le mae’a i le manuia o ta’otoga sa faia ma momoli ai le faafetai a le malo o Samoa i le polokalame fesoasoani ua maua ai se lavea’i mo nisi o fanauiti a le atunuu sa mana’omia lea vaega tāua o auaunaga faafoma’i.
O le to’atolu o fanau mai Samoa sa faia ta’otoga o le fatu i Fiti o se pepe 9 masina le matua o ia lea o Pesei Tauuso, o Kiana Mata 3 tausaga le matua ma Uaita Tavita e 10 tausaga lona matua.
