E to’atasi le sui sa faaulu lona suafa e avea ma sui tauva o le palota tele a le atunuu, ua toe faaui i tua ina ua faamuta i le Aso Faraile ua mavae le piliota e toe faaui ai i tua suafa o ni sui faatutū.
Ua faailoa e le Komesina o faigāpalota i lana faasilasilaga faalaua’itele, o le afioga Vui Seinafolava Sione Masinamua sa lesitala o se sui tauva mo le faigā filifiliga a Faasaleleaga 5 ua toe faaui i tua lona suafa.
E 191 suafa o sui faatutū na tapunia le lesitala mo ē e fia tauva i le faigāpalota ua faamauina.
O lona uiga ua totoe ai le 190, peita’i e sefulutasi isi sui faatutū o loo fesiligia lo latou agavaa o ni sui faatutū i tagi ua faaulu atu i le faamasinoga o faigāpalota.
O loo aofia ai nisi o sui faatutū o loo tauaveina le fu’a a le vaega faaupufai o le Faatuatua i le Atua Samoa ua Tasi, le vaega e puipuia aiā tatau a tagata, ma le patī faaupufai o le Samoa ua Potopoto.
