E lē faigofie i le faiaoga ulu ma le ta’ita’i malaga o le tatou au lakapi o le Manu Samoa tapenaga mo le taaloga i le faaiuga o le vaiaso nei o le a toe feiloai ai ma le ‘au a Chile e saili lava so tatou avanoa pe sao atu i le ipu o le lalolagi i le tausaga e 2027.
Ua faailoa e le taitai malaga i se feiloaiga i le Aso Tofi i Samoa le susuga Su’a Hesed Ieremia, e to’asefulu tama sa filifilia mo le ‘au i le taamilosaga ua maea o le Ipu a le Pasefika ua tu’ua le latou mafutaga.
O nisi ua faamanu’alia, o isi ua toe foi ia latou kalapu lakapi o loo taalo ai, ao isi o mafuaaga le maalofia ua tuua ai le ‘au.
O le taeao o le Aso Sa o muamua nei le taaloga lona lua ma Chile ma e tatau ona tatou manumalo ai mo se avanoa e agavaa ai ile isi ipu o le lalolagi.
Se finagalo o le ta’ita’i malaga o le tatou Manu Samoa susuga Su’a Hesed Ieremia i se faatalanoaga ao faamautu ai nei le tatou au ile aai o Santiago le aumua o le atunuu o Chile, lea o le a faia ai le taaloga ile aso Sa o lumanai nei, ae o le Aso Toonai i lea atunuu.
