I le tasi o le talosaga na faaulu i le faamasinoga i le Aso Faraile na te’a nei mo le toe faitauina o palota e pei ona iai le matāupu mai le itumalo faapalota o Palauli 2, o lea ua faailoa mai e le Ofisa Sili o le matāgaluega o faamasinoga ma le faafoeina o matāupu tau faamasinoga, e sefulu isi talosaga ua faato’ai atu e autū lava i le toe faitauina o le aofa’iga o palota na maua e le sui na manumālō ma le sui na tulaga lua.
Alofaifo Lamese
O ia talosaga ua faaulu i le Faamasinoga Faaitumalo e sui tauva o le vaega faaupufai e puipuia aiā tatau a tagata e aofia ai le sui tauva tama’ita’i mai le itumalo o Alataua i Sisifo le afioga Aliimalemanu Moti Alofa Tuuau, o le talosaga a Mulipola Leiatausalesā Leiataualetauā Laki mai le itumalo o Aiga i le Tai, o le talosaga a Fuaava Saumalu Suluimalo Amataga Penaia o Aleipata Itupa i Luga, o le talosaga a le sui tauva o Pipi Pauli Tevita Tariu Sinapati mai Faasaleleaga 1, o le talosaga a le sui tauva o Tologataua Sooalo Sioeli Alofaifo Lamese mai Gagaifomauga 2, o le talosaga mai Faasaleleaga 5 ua faaulu e Peseta Vaifou Tevagaena, talosaga a Lautafi Fio Selafi Purcell mai Satupaitea, o le talosaga a Tuala Olivetti Ah Him mai le itumalo faapalota o Sagaga 3, o le isi talosaga ua faaulu e le sui tauva sa seei i le nofoa o le itumalo o Aana Alofi 2 le afioga Aiono Tile Gafa, ma le talosaga a le sui sa tauva i le nofoa o Aana Alofi 3 o Niuapu Alofaiva Faaui II Leiataualesa.
O ia talosaga e sefulu o loo lu’i ai le faitauga aloa’ia ua manumālō ai sui tauva filifilia o le vaega faaupufai o le Faatuatua i le Atua Samoa ua Tasi.
O le Aso Lua o lenei vaiaso ua fofogaina ai ia talosaga i le Faamasinoga Faaitumalo.
