To’asefulu minisita o le malo tausi ua lē toe filifilia e o latou itumalo

I le to’asefulufā o minisita o le Kapeneta e aofia ai le Palemia o le malo tausi sa tauaveina tiute o le Pulega Faatonu ina ua faamavae le tasi o minisita ona o moliaga tau taavale afi, o loo tālia se faai’uga a le faamasinoga, o le taunuuga o le faigāpalota a le atunuu ua molimauina ai e to’asefulu minisita ua lē toe filifilia mai e o latou itumalo, ae ua filifilia mai ai ni sui tauva fou e tauaveina nofoa o ia itumalo.

O le afioga i le Sui Palemia le afioga Tuala Toiaivao Tevaga Iosefo Ponifasio mai le itumalo o Gagaemaua 1, o le afioga Valasi Luapitofanua Toogamaga Tafito Selesele mai le itumalo o Vaisigano 2, o le tofa Niuava Eti Malolo mai le itumalo o Vaisigano 1, o le tofa Olo Afoa Fiti Vaai mai le itumalo o Salega 2, o le afioga Toeolesulusulu Cedric Schuster mai le itumalo o Aana Alofi 4, o le afioga Faualo Harry Schuster mai le itumalo o Vaimauga 4, o le tofa Lagaaia Ti’aituau Tufuga mai le itumalo o Palauli 3, o le tofa Matamua Seumanu Vasati Pulufana mai le itumalo o Faasaleleaga 1, o le afioga Lautimuia Uelese Vaai mai le itumalo o Vaimauga 3, ma le afioga Laumatiamanu Ringo Purcell mai le itumalo o Safata 2.

Ua toe filifilia le afioga Fiame Naomi Mataafa e lona itumalo o Lotofaga faapea le tofa Leatinuu Faumuina Wayne Sooialo e le’i palotaina le tofi o lona itumalo o Faleata 2 ona o faai’uga a le faamasinoga i lu’i o monotaga faalenuu.

O le tofa Mau’u Siaosi Puepuemai sa tauva faatuto’atasi ona o le finagalo o lona itumalo, lea ua toe filifilia mo le nofoa o Vaa o Fonoti, o le afioga Seuula Ioane e le’i toe tauva i le faigāpalota mo le nofoa o lona itumalo o Alataua i Sisifo.

O le afioga Faleomavaega Titimaea Tafua na faamavae ma le tofi minisita o le Kapeneta ona o moliaga tau solitulafono o taavaleafi ae ua toe filifilia e lona itumalo o Aleipata Itupa i Lalo.

E tuufaatasia lenei lipoti o loo tālia le taunuuga o le faitauga aloa’ia a lea itumalo.