E le’i atoa le 24 itula talu ona tuuina atu a tatou lipoti i le faaalia ai o popolega o le faalapotopotoga o le Brain Injury Support Group i le amata faatautaia ai o le taaloga o le “Run It Straight” i Aukilani nei, ae ua māua se tala faanoanoa i le aafia ai o ni alii se to’alua i le faatinoga o le taaloga i le afiafi o le Aso Lulu.
I lipoti mai le 1News e fai lava sina mata’utia o le faalavelave na tula’i mai a o faatautaia lea taaloga i le Auckland’s Trust Arena i le po anapo.
Mo le silafia, o ē o loo ta’ua i le lipoti e faapea, na fai lava sina ogaoga o le taimi na feto’ai ai i la’ua nei.
Ua faamauina i le taimi na feto’ai ai i la’ua na tau fai matapogia uma i luga o le malae.
O le tasi o alii na pa’ū ma matapogia, ma vaaia le oso ai o lona ma’i poo seizures, ae o le isi na togafitia lava o ia ma mafai ona tu i luga ma ta’ita’i i tua o le malae.
Ua faamauina e silia i le to’aafe tagata na aga’i e molimauina le taaloga ma e to’avalu alii na resitala e auai e faatautu’i tino ina ia manumālō i le $20,000 tālā Niu Sila.
E le’i faataunuuina nisi o taaloga na fuafua e faatautaia i le Williams Park in Māngere, ta’ua e le puleganuu a Aukilani e le’i maua atu se faamatalaga i tagata o loo tuufaatasia lea polokalame mo se pemita e faataunuuina ai le taaloga.
Ma o le ala lea ua taofia ai le taaloga o le Run It Straight mai le faatino ai i nisi o itu o Aukilani.
E ui i le tuu mai ai o lenei faalauiloa a le Puleganuu ae o loo alia’e mai ai se fesili, poo le pemita sa’o le mafua’aga o le taofia ai o lenei taaloga po ua tilotilo le Auckland Council i aafiaga o lenei taaloga i le soifua mālōlōina o le tagata?
Puna o Faamatalaga: https://www.1news.co.nz/2025/05/22/two-men-knocked-out-at-run-it-competition-in-west-auckland/
