E lē o mapu le Matāgaluega o le Soifua Mālōlōina i le taulogologo pea i le atunuu aemaise o mātua, ina ia vave ave alo ma fanau e vaai se foma’i, pe a vaaia āuga tigāina o le faama’i fiva o ponaivi poo le dengue fever o loo pesia ai le atunuu.
Faaalia e le matāgaluega e tusa lava pe ua te’a le fiva ae ia vave vaai se foma’i aemaise o āuga e pei o le tigā o le manava, faasuati, piliki ma sau le toto poo le palapala i le fofoga poo le gutu o le fanau o loo maua i le faama’i, pua’i toto, topetope le mānava, vaivai ma gagase le tino ma ua lē maua se mālōlō lelei.
O le faai’uga o le vaiaso na faailoa ai i lipoti le fano o le ola o se tamaitiiti 2 tausaga le matua ona o āuga o le fiva o ponaivi.
O le uso matua e iva tausaga o lea tamaitiiti na muamua fano le ola i le Aso Tofi ae Aso Toonai uma le ola o le tamaitiiti 2 tausaga.
Ua to’alima ai fanau ua maliliu i lea faama’i talu mai Ianuari o lenei tausaga.
E le’i aumaia lava se faamatalaga aloa’ia mai le auaunaga a le soifua mālōlōina e tusa o le fano ai o ola o ia fanau ae o le vaiaso nei ua toe faaauau ai ona tapunia a’oga uma i le atunuu ona o le pepesi o le fiva o ponaivi.
O le faai’uga o le vaiaso ua mavae na faailoa lautele ai e le Ofisa Sili o le pulega o le Matāgaluega o Aoga ma Aganuu le faai’uga a le Kapeneta ia toe mālōlō uma a’oga mo le isi vaiaso ona o puipuiga o fanau mai aafiga o le faama’i.
