A o tālia ai nei le Aso Gafua o le vaiaso fou e fofogaina ai mo le valaauga muamua tagi e sefulutasi ua lu’i ai le agavaa o nisi o sui faatutū faapea nisi o faai’uga a le Komesina o faigāpalota, e to’afitu sui sa avea ma faipule i le paeaiga 17 a le Palemene ua faatā’ape o loo tuuina atu nisi o ia tagi, ae to’atasi se tama’ita’i sa avea ma faipule o le paea’iga 17 o loo tauaveina le tofi minisita o le malo tausi o loo molia i se tasi o tagi.
I tagi nei e 11 o le itumalo faapalota o Gagaifomauga 1 o loo faaulu ai se matāupu ua lu’i ai e le susuga Laaulialemalietoa Leuatea Polataivao Fosi le agavaa o le sui tauva tama’ita’i ua lesitala e tauva i le nofoa o lea itumalo le afioga Faaulusau Faatoatoa Rosa Duffy Stowers.
O loo molia ai foi ma le Komesina o faigāpalota.
E to’alua sui tauva mo le faigā filifiliga a lea itumalo palota i Salafai.
I Faleata 4 o le tagi a le tofa Ale Vena Ale faasaga i le agavaa o le tasi o sui tauva le afioga Pepe Christian Fruean, Faasaleleaga 1 o le tagi a le sui tauva o Seumanu Saunoaimalu Nuu Faimata Su’a faasaga i le agavaa o se tasi o sui tauva o lea itumalo faapalota le tofa Matamua Seumanu Vasati Pulufana o se tasi o minisita o le malo tausi ae sa avea ma faipule o lea itumalo i le paeaiga 17 a le Palemene.
O le isi tagi mai lea lava itumalo ua faaulu e le sui tauva o Leatigaga Matafai Lauina Iiga faasaga i le tasi o sui tauva o le tofa Pipi Pauli Tavita Tariu.
O le itumalo o Faleata 2 e tolu matāupu e aofia ai tagi e lua ua faaulu e le tofa Leatinuu Wayne Sooialo sa seei i le tofi faipule o le itumalo o se minisita o le malo tausi, faasaga i le agavaa o sui tauva le tofa Ulugia Elon Piliopo Betham ma le sui tauva tama’ita’i le afioga Muaaufaalele Mary Fou Ta’eu.
O le isi tagi ua faaulu e le sui tauva o Muaaufaalele Mary Fou Taeu faasaga i le tofa Leatinuu ma le Komesina o faigāpalota.
O le itumalo o Faleata 3 o le tagi ua faaulu e le sui tauva le tofa sa Paloa Louis James Stowers faasaga i le sui tauva sa seei i le tofi o lea itumalo le tofa Lealailepule Rimoni Aiafi, O le itumalo o Gagaemauga 1 e lua tagi ua faaulu e le sui tauva sa seei i le tofi o lea itumalo o le Swwaui Palemia o le malo tausi le afioga Tuala Toiaivao Tevaga Iosefo Ponifasio faasaga i agavaa o sui faatutū e to’alua ua lesitala mo le faigā filifiliga a lea itumalo faaapalota, o le tofa Vaaaoao Salumalo Alofipo, Lauano Mulivai Lauano Pau.
I le ma le tagi a se sui tauva mo le itumalo o Vaisigano 2 ua faaulu e lē sa seei i le tofi faipule o le minisita o le malo tausi le afioga Valasi Luapitofanua Tafito Selesele, ua lu’i ai agavaa o le tasi o sui tauva mo le nofoa o lea itumalo, Le Tagaloa Leilua Tupou Afa.
E ono tagi o loo tatalo mo se poloa’iga e faalēaogā ai le avea ma sui tauva ma tatalo ai foi e faalēaogā le faai’uga a le Komesina o faigāpalota, ae lima tagi o loo lu’i ai faai’uga a le Komesina o faigāpalota.
E lē gata la ina faasaga ia tagi uma i nisi o sui tauva ae o loo molia ai foi ma le Komesina o faigāpalota.
O le valaauga o nei matāupu i le faamasinoga o faigāpalota i le Aso Gafua a sau o le a faatulaga ai aso e su’esu’eina ai.
O le Aso Faraile 15 o Aokuso ua faatulaga e le faamasinoga e tatau ona maua uma ai faai’uga o ia tagi.
