Ua faamaonia mai e to’afā ni tagatānuu Niu Sila o loo aofia nei i le to’atele o tagata ua faia sa latou tagi o se sū faasaga i le ofisa o femalaga’iga i le ‘ea, le Singapore Airlines i se faalavelave na tula’i a o iai i sa latou faigamalaga. 

Mo le silafia o lea matāupu na tula’i mai i le aso 21 o Me o le tausaga na te’a nei 2024.

O se faigamalaga na aga’i mai Lonetona e aga’i mo Singapore ae māua ai loa le faafuase’i ona aafia ai o le vaalele la’upasese ina ua fetaia’i ma ni faaletonu o le tau e tusa ma se vaega ua ta’ua o air turbulences.

Faamauina e fai lava sina malosi o le lūlū o le vaalele ona o le faaletonu ma i’u ai lava ina pa’ū le vaalele mo ni ni nai sekone ma molimauina ai le mata’utia o aafiaga e pei ona pa’u’ū ai o ato pe na featofa’i solo ato ma mea aogā a tagata, ma na oo lava i se tagata na aafia ma maliu ai ona o lea faalavelave. 

E oo atu i le $1miliona seleni o loo finau ai le ‘au pasese ua faia le sū e aofia ai ma ni tagata Niu Sila se to’afā.

Faamauina i lipoti, o lenei sū o loo aga’i tonu i se sesē ma se faatamala o le pailate na tauaveina le vaalele ua afua ai le faaletonu, ma aafiaga faalemafaufau (PTSD) ua feagai nei ma le to’atele ona o lea faalavelave mata’utia. 

Ua tuuina mai se faatoesega a le Singapore Airlines i le mamalu o le pasese na aafia aemaise o aiga, ma ua faailoa foi lo latou galulue ai e tali i su’esu’ega o loo faatautaia nei. 

E 211 le pasese ma le 18 o tagata faigaluega poo le air crew na malaga i le vaalele (faigamalaga Flight SQ321) ma e to’atasi na fano lona ola i lea faalavelave.

Puna o Faamatalaga: https://www.newstalkzb.co.nz/news/national/kiwis-part-of-lawsuit-fighting-for-compensation-from-singapore-airlines-flight-321/