E toʻalima i latou ua faaulu atu a latou tagi i le ofisa o leoleo faasaga ia Fiu Sikuka Lomitusi.

Ua faaalia e le alii Komesina o Leoleo ia Auapaau Logoitino Filipo ina ua fesiligia e le Radio Samoa e faapea o tagi e lua mai tagi e lima ua faaulu atu lea ua molia ai Fiu i moliaga o le Defamation, Harassment using Electronics means ma le Insulting Words.

Ua faailoa foi e le Komesina o isi tagi e tolu o loo faaauau iai suʻesuʻega a leoleo i le taimi nei. Ua tatala i tua i le afiafi nei Fiu mai ananafi lea na taofia ai i le vaaiga a leoleo, ae ua faailoa e Auapaau e toe avatu foʻi taeao Fiu e faailoa iai isi mataupau ia ua toai i le Ofisa.

O Fiu o se alii e fai lana polokalame o le Tamaaleʻeleʻele Faumuina Lomitusi i luga o le Youtube, ma e alala i Niu Sila.