E oo mai i le taeao nei, o lea ua māmā le mamafa o timuga i Gore ma o lea foi ua tatala nofoaga ua faia faapitoa mo tagata ua aveesea faamalosi mai o latou fale.
A o Queenstown o lea ua poloaia le poloaiga o faalavelave faafuasei aloaia mai le ‘afa o le ono i le taeao nei, a o faaauau ai pea ona tigaina le South Island.
O le siisii o vaitafe ma lolovaia le tele o vaega o Queenstown ma i tala mai le pulenuu o Queenstown Glyn Lewers ua faia le poloaiga o faalavelave faafuasei ona ua feololo fale ua faaleagaina anapo ona o le malolosi o tafega.
E oo atu i le toaselau tagata na malu anapo i fale ua faia faapitoa mo aiga aafia o Queenstown.
I lipoti lata mai i le taeao nei mai Queenstown, e i le va o le 10 – 20 aiga ua aveesea faamalosi mai o latou fale.
Na tapunia le tele o aoga i Queenstown i le asō, le aso mulimuli o aoaoga o lenei kuata.
E le o faigofie ia Queenstown, o lea foi ua iai i se tulaga lamatia le maketi o turisi ona o le faaleagaina o le suavai.
O Queenstown o lea ua faatonuina le tatau ona faapuna muamua o le vai ma ua tuuina atu foi i le council le compliance order mai le pulega o suavai.
