O loo tigaina nei i le falema’i se alii na fana e le tagata i Melepone i le vaiaso nei.

Fai mai molimau a i latou na maua atu sia tagata e 36 tausaga o si alii mai Dandenong e maua atu o taoto i le ogatotonu o le alatele i Armata Crescent i Frankston North i le te’a o le ‘afa o le fitu i le afiafi o le Aso Gafua.

Na fesoasoani iai i latou ia ma ave ai i le falema’i mulimuli ane e tigaina.

O loo faaauau su’esu’ega a leoleo ae o nisi faamatalaga ua lipotia i le 9News ua ta’ua ai sa iai se kulupu o tagata na aga’i ane ma faaleaga le taavale a lē ua aafia i ni pate ma mulimuli ai fana ma sosola ese.

O loo iai ata a le CCTV o loo maua ai le faalavelave ma vaaia ai ni tagata se to’alua o tamomo’e ese mai le nofoaga lea fai mai molimau ua faatumulia le magaala i leoleo i le faatinoina o le su’esu’ega.

O loo faaaogā ma ta’ifau su’esu’e a leoleo i le latou su’esu’ega.

E lē o iai se talitonuga e aafia ai se kegi i lea faalavelave ae ua faaleo foi popolega o tagata e aumau ai i lea magaala ona e to’atele foi nai a latou fanau.

Ua fautuaina soo se tasi e silafia se faamatalaga ia faafesoota’i vave leoleo poo le Crimestoppers.

Puna o Faamatalaga: https://www.9news.com.au/national/frankston-south-man-fighting-for-life-after-shooting-in-melbournes-southeast/a0ce894d-64e8-415a-b683-cc56012736c8