Ua matuā teena e tagata o loo nonofo i Aukilani i Saute le fuafuaga a le malo e faaitiitia i le ta’i lua vaiaso ma ao le lapisi.
Ua alu atu se valaau mai tagata o ia faaitu i le pulega a le aai, ina ia taofia le faata’ita’iga lea e tau fai e faamautinoa ai poo le a faataunuu lea fuafuaga mo ia faaitu.
O ni pitonuu i Clendon Park i Weymouth i le itu i Saute, o Te Atatu Peninsula i Aukilani Sisifo ma Panmure i Tamaki i le itu i Sasa’e, lea ua filifilia mo le fuafuaga e ono masina o le a faata’ita’i ai ona aoina le lapisi e ta’ilua vaiaso ma ao.
Ma e tusa ma le 10,000 fale o aiga o le a faatino ai lena faata’ita’iga e amata ia Fepuari o le tausaga fou.
Na lagona le matuā tetee o finagalo o tagata sa auai atu i se fonotaga sa faia i le afiafi o le Aso Lulu i Clendon Park, sa faatautaia e le councillor mai le pulega a Manurewa Papakura, susuga Daniel Newman.
O nisi e manatu ua lē fetaui tele le taimi ua fuafua mo lenei faata’ita’iga, o le vaitaimi o le taumafanafana, auā afai e umi ona tutū kalone lapisi ma vevela i le la, velasia atu ai ma le tele o lapisi o i totonu, o le a tumu saisai nei kalone lapisi ma tele ai le lago ma isi iniseti leaga faapena o le a maua ai.
Ua faatulaga e amata i le aso 13 e oo i le aso 31 o Oketopa ni faatalanoaga o le a faia ma tagata lautele, e amata i tagata i nofoaga ia o le a aafia, ona faato’ā tatala atu lea o le avanoa i soo se tagata.
O ni finagalo o le a aoaoina mai na faatalanoaga, ona silasila ai lea iai o le pulega e fua iai sa latou faai’uga pe talafeagai ona faatino loa ma faamautū lenei fuafuaga pe toe tuu ese.
Puna o Faamatalaga: https://www.rnz.co.nz/news/national/572802/south-auckland-residents-slam-plan-to-cut-rubbish-collection-to-fortnightly
