O le masina o Novema o le tausaga nei lea ua faatulaga e le faamasinoga e valaau ai molimau o le matāupu tau faamasinoga o loo molia ai le tama’ita’i tusitala sinia o Taliilagi poo Lagi Keresoma o le vaega faasalalau i upega tafa’ilagi le Talamua, ina ua mae’a tuuina atu le tali tetee a le tusitala i le moliaga e tasi o le taufaaleaga e mafua i se lipoti sa ia tusia ma faasalalau.
O se alii sa galue o se leoleo poo se malu o le malo o loo tagi faasaga i le tusitala sinia o le Pelesetene foi o le asosi a tusitala ma le ‘aufaasalalau a Samoa.
I se tasi o matāupu ua lipotia mai le Faamasinoga Faaitumalo o le teena ai lea e le tama’ita’i o Lise Marie Schmidt o moliaga e 19 a leoleo.
O ia moliaga e mafua mai i le tusi na ave e lē ua molia i le Loia Sili ma le tusi i le Ao o le Malo sa faailoa ai ni tuua’iga o ni aafiaga o le Palemia o le malo tausi i le maliu o le tama’ita’i polofesa o Caroline Sinavaiana Garbbard.
O Fepuari o le tausaga fou 2026 ua faatulaga e valaau ai molimau o lenei matāupu tau faamasinoga.
