O loo tetee le tama’ita’i na tula’i i luma o le Faamasinoga Faaitumalo i Aukilani i le Aso Lulu, o ananafi lea i moliaga e fesoota’i atu i le alualutoto lea na maua lona tino ua maliu i le Albert Park i le taeao o le Aso Sa talu ai.
Na mua’i tula’i le tama’ita’i lea i le Aso Gafua i le faamasinoga e faaaogā ai se video link ae le’i faia ai sana tali i ona moliaga o le natia o le tino oti o se tamaitiiti.
Ma na tāpā ai foi le tuuina ane i leoleo o lona tusifolau e taofia ai ae sa tatala pea i tua i lalo o ni tuutuuga, ma taofia le faailoa faalau’aitele o lona suafa.
Ae ina ua toe tula’i i luma o le faamasinoga i le aso ananafi o lea na faaleo ai lana tali e tetee i ona moliaga.
Ta’ua i le lipoti le auai atu o nisi e lagolagoina lenei tama’itai ina ua toe tula’i i le faamasinoga ananafi.
O loo faagasolo pea la su’esu’ega i lenei faalavelave ma o loo talanoa atu leoleo i nisi o loo iloa lenei faalavelave ina ia taumafai e faamautū faamatalaga uma e lagolagoina ai le mea tonu na tupu.
O le Aso Gafua lea sa faatulaga e faia ai se ta’otoga e faamautū ai le mafua’aga lilo o le maliu, ma e leai foi se isi tagata o toe aga’i iai su’esu’ega a leoleo e ese mai le tama’ita’i ua tula’i nei i le faamasinoga.
Saunoa le tama’ita’i pulenuu lagolago o Aukilani, Desley Simpson, o se tulaga na faate’ia ai o ia ma faanoanoa ai foi ina ua maua le tino maliu o si nei alualutoto, ma o loo taumafai foi e fesilisili atu i lana aufaigaluega mo nisi o silafia ni faamatalaga o lenei faalavelave.
Puna o Faamatalaga: https://www.nzherald.co.nz/nz/woman-pleads-not-guilty-after-newborn-babys-body-found-in-albert-park-auckland/K35WY4VMT5DGXK3CVMR4KCRTAY/
