O le tapenaga a le komiti o le faalapotopotoga o faaputugatupe o le lumana’i manuia o tagata poo le NPF, ina ia faatino le tulafono ua pasia e faasino i le inisiua o le soifua mālōlōina mo ana tagata fai saofaga i se tulaga e faamalosia pe compulsory, ua faaauau pea ona faatalatalanoa ai isi paaga totino a le NPF.
Ua faailoa e le Palemia o le malo tausi, o lea tapenaga o loo tetee iai le faalapotopotoga o tagata faigaluega a le malo le Public Service Association poo le PSA, peitai ua faaalia e le Palemia le afioga Fiame Naomi Mata’afa, o se tapenaga e mana’omia ai pea ona faatalatalanoa.
O se tasi o matāupu sa fesiligia ai le Palemia o le malo tausi o le faai’uga a le Komiti Faafoe o le pulega o tagata tafafafao e faamālōlō lē tumau le pule poo le Ofisa Sili o le pulega o tagata tafafao mai fafo le Samoa Tourism Authority.
Faaalia e le Palemia e le’i oo atu ia te ia se tala lata mai o lea matāupu ae o loo taoto nei i le matāgaluega o faalapotopotoga tuma’oti a le Malo.
Le afioga Fiame Naomi Mata’afa o le Palemia o le malo tausi, ae o le minisita o le pulega o tagata tafafao mai fafo.
Ua savalia nei le fā masina talu mai Fepuari o le tausaga nei na faamālōlō lē tumau ai le tamaitai Ofisa Sili o lea pulega le afioga Toleafoa Pativaine Petaia Tevita.
O le mafua’aga ua faailoa o lea faai’uga o le faatinoga o nisi o tiute o le Ofisa Sili ua lē faamalieina.
